فردِت الشَّمس عالتّلال الغافية
خيوط الفَجر
وهدرِت المَيّ الجارية بهاك النَّهر
والعصافير اللي واعية تمجِّد خالقها بكِّير
فردِت جناحاتها تا تطير صَوب البحر
وهالزّهور الملوَّنة وبحَلاها وألوانها مزيَّنة
نَشرِت من حَولها كل العطر
وهالنَّسمات الخجولة عم بتوَشوِش ها الأرزات البَتولة
بهَمس متل السِّحر
وْقِفت مَسحورة بجَمال هالصُّورة
وقلت يا رَب كيف في ناس بتنكُر وجودك
وأنا شايفتك قدَّامي وبريشة ألواني إنتَ الحِبر
مين اللي قال الرَّب أُسطورة؟
مين اللي قِدِر رَسَم هالصُّورة؟
مين اللي خَلَق هالكَون
ونوَّر هالدِّني بشَمس وقمَر؟
شو قاسية وشو ظالمة قلوب البشر
يا رَب اِسمَع صلاتي وما تسَكِّر أُذنيك
مدّ لكل خاطئ الرَّحمة بيَديك
ومتل ما هالنَّهر لاقى دَربُه بين هالصّخور
كَسِّر قلوبنا واِعبُر
ولاقي دَرب إلَك جوَّات ها الصَّخر
مقالات مُشابِهة
شعر: بذكرى ميلادك ربي
شعر: سيد كل الشعوب
شعر: ابن آدم
تبغى تتواصل مع مسيحي؟ تواصل معنا بكل امان الحين.
